कोरबा के छै दूरस्थ गांव के गांव वाले मन के सहारा बनिस पीडीएस
रायपुर 22 जुलाई 2024। सुग्घर वितरण प्रणाली ले देश-विदेश म अपन पहिचान साबित कर डरे छत्तीसगढ़ के सार्वजनिक वितरण प्रणाली (पीडीएस) सही मायने म गांव वाले मन बर वरदान साबित होवत हे। दूरस्थ अंचल तक शासकीय उचित मूल्य के दुकान संचालित होए ले पहाडी अउ सरहदी इलाका मन म बसइया गांव वाले मन के सहूलियत बाढ गए हे संगेच सैकड़ों गरीब परिवार मन ल समय म खाद्यान्न मिले के गारंटी घलोक हो गए हे। राज्य म अइसन कई ग्राम पंचायत हे जेन दूरस्थ क्षेत्र म होए के संग मजरा टोला अउ पारा ले जुड़े हे अऊ ए गांव मन के आबादी न तो घना हे अऊ न ही अधिकांश घर आस पास हे। विषम परिस्थिति के बीच रहइया अइसन गांव वाले मन के शासकीय उचित मूल्य के दुकान खाद्यान्न सहायता योजना अंतर्गत मिलत खाद्यान्न ही एकमात्र सहारा हे, जिहां ए मन ल हर एक महिना चावल समेत दुसरा सामान मिले के गारंटी होथे। कोरबा जिला के सुदूर वनांचल लामपहाड़ संग बगदरीडांड, परसाखोला, बहेरा, खोरी भावना, सरडीह के कार्डधारी मन ल पहिली अपन ग्राम पंचायत ले 12 ले 17 किलोमीटर तक के दूरी तय करके खाद्यान्न लाना परत रहिस। ए बेरा ओ मन ल खाद्यान्न लाय बर किराए के वाहन तक लेना परत रहिस। मुख्यमंत्री श्री विष्णु देव साय के मंशानुशार कलेक्टर के हुकुम म खाद्य विभाग ह राशन दुकान ले बहुत दूर आश्रित ग्राम मन के कार्डधारी मन ल नजदीक के राशन दुकान मन म खाद्यान्न लेहे के व्यवस्था करे हे। ए व्यवस्था ले सबले जादा दूरस्थ क्षेत्र लाम पहाड, सरडीह, बगदरीडांड म रहन वाले पहाड़ी कोरवा लाभन्वित हें।
